ده بوست للدفعة الجديدة اللى لسة داخلين و الناس اللى موجودة كمان عشان فيه ناس دخلو القسم و اتخرجوا و هما لسة ميعرفوش القسم ده بتاع ايه
اولا ً علم الاجتماع او السيسيولوجيا ده من اسمه كده ده العلم اللى بيدرس المجتمع ، و التفاعلات بين الناس اللى فيه
القسم ملهوش اى شروط وبيتقبل حسب الطاقة الاستعابية ليه
الدراسة بتبقى لذيذة لو انت حبتها فيه ، بتدرس سياسة و فلسفة و اقتصاد و حجات تانية كتير بس طبعا ً من المنظور الاجتماعى
يعنى بتدرس فى السياسة علاقتها بالمجتمع و تأثير الدولة و السلطة و الطبقة على العلاقات الاجتماعية و هكذا
بالنسبة لو انت عايز قسم تتخرج منه بسرعة و سهل و تذاكر قبل الامتحان باسبوع و تنجح ، فانت فى القسم المظبوط ، بس صدقنى لو عملت كده مش هتستفاد حاجة و الشهادة بتاعتك عمرك ما هتشتغل بيها
خلى بالك ، بيبقى فيه تدريب عملى طول السنة و لازم تحضره ، بيبقى يوم فى الاسبوع ، و بتروح زيارة لمؤسسة اجتماعية ، ملجأ .. دار مسنات .. مصنع ... الخ
القسم المفروض بيخرّج باحثين اجتماعيين ، الباحثين الاجتماعيين دول مهمتهم انهم يدوروا ف مشاكل المجتمع و يلاقولها حلول ، دول بيشتغلو ف مراكز الابحاث ، و مؤسسات حقوق الانسان و المجتمع المدنى ، بيشتغلو كمان مراكز الدرسات الاستراتيجية ، و دول طبعا ً صفوة القسم ، الناس اللى بتفهم و بيحبوا علم الاجتماع
بتشتغل و يبقى اسمك باحث فى العلوم الاجتماعية
فيه مشاهير كتير من علماء الاجتماع خصوصا ً الاجتماع السياسى ، زي د/ رباب المهدى و د/ عمرو حمزاوى ، اصلا ً العلاقة بين علم الاجتماع و علم السياسة قريبة جدا ًولو انت مهتم ، و كان نفسك تدخل كلية اقتصاد و علوم سياسية هتلاقى نفسك مبسوط
باقى الناس بقى و اللى مش مهتمين بالدراسة اوى بيشتغلو اخصائيين اجتماعيين ف اي حتة ، مدرسة ، مصنع مستشفى ، كل المؤسسات تقريباً بيبقى فيها اخصائيين اجتماعيين . بس كده انت بتبقى زيك زي خريج معهد الخدمة الاجتماعية .
باقى الناس بقى و اللى مبيشتغلوش باحثين ولا بيشتغلو اخصائيين اجتماعيين بيبقى لهم فرص هايلة جدا ً انهم يشتغلو مندوبين مبيعات ، او عواطلية ع القهاوى
قول يا رب و استبشر خير
تابعنا دايما على جروب دفعة المستجدين لطلاب صوت الميدان لاى استفسار
ولمزيد من معرفة الاخبار وتفاصيل الاقسام اضغط هنا
بقلم : مصطفى السيد
