 |
| مصطفى السيد |
ايه علاقة ده بالكلية طبعا ً ، انا هقولك ، الموضوع كله بدأ مع ان اتحاد طلاب مصر حط مقترح للايحة الطلابية ، و دى ببساطة اللى هي الدستور اللى بيحكم علاقة الطالب بادارة الكلية ، المهم اليوم الساقع نشرت المقترح ، و ساعتها استغربنا من اللى مكتوب ، لأن اللايحة كانت اقل من طموحنا .
المهم وقتها حصلت اول مطّة فى الموضوع ، قلنا لاتحاد طلاب كليتنا العظيم ايه موقفك من اللايحة دى ، قام قالك ، استنوا بيان قاطع ، و قعد يمط يمط يمط الميعاد لحد ما اعلن موقفه من اللايحة دى بعد محايلة و وجع دماغ .
المهم البيان بتاع اتحاد الطلاب ، و اللى غالبا صاغه المتحدث الرسمى باسم الاتحاد ، مهاب عصام ، و طبعا ً هتسألنى هو فيه منصب اسمه المتحدث الرسمى باسم الاتحاد ، هقولك لأ طبعا ً بس اهو غلاسة كده .
نرجع للبيان ، البيان قاللك ايه ، قالك نرفض اللائحة الطلابية ، لانها مطاطة . و الله قالو مطاطة يا جدعان ، و العهدة على الراوى ، الكارثة بقى ان البيان بتاعهم ده ، هو ذات نفسه مطاط ، و مبيقولش اي جديد ، المهم سيبك من كل ده .
بعدها بيومين كان رئيس اتحاد جامعة اسكندرية فى كليتنا بالصدفة ، لما اتقابل مع مجموعه من طلاب صوت الميدان ، و فوجئنا انه بيقولنا ان اتحادنا المطاط ، مرفضش اللايحة ولا حاجة ، و انه كان بيمط بس و ان الاتحاد بتاعنا موافق رسميا على اللايحة .
اللطيف بقى ان رئيس الاتحاد بنسأله هو ازاى غير رأيه فى المقترح ، لما كان ف اسكندرية قال كلام ولما راح القاهرة قال كلام تانى ، قالنا ايه بقى ، قالنا اصلى كنت مدى لنفسى " مرونة " بحيث انى اغير مواقفى .
المهم عشان موجعش دماغك عزيزى القارئ الهدف من المقال ده انى اقولك ان تعلمينا بقى ما شاء الله زي الاساتوك ، لايحة مطاطة ، و اتحاد مطاط بيصدر بيانات مطاطة ، و رئيس اتحاد جامعة مدى لنفسه مرونة
و وقتها بس عرفت عظمة المطرب حمدى بتشان لما غنى اغنيته الاشهر ، ايه الاساتوك ده .
