ما سأكتبه قد يكون قاصر و مخل بس اهى محاولة من شخصى الغلبان ، محاولة للرد على الناس عبدة الصناديق ، اللى بيختزلوا العملية الديمقراطية كلها فى الصندوق كأن الديمقراطية دى مش عملية ليها أركان كتير غير الصندوق وانه جوهرها الأصلى انه الناس تشارك فى إدارة شئونها قدر الامكان و تكون مسئولة عن الخيارات اللى بتحدد حياتهم على اد ما يقدروا .
الكلام للى فاهمين انه الشعب كل دوره فقط انه كل خمس او 6 سنين يختار مين اللى هيتحكم للشعب فى افكاره الخمس او ست سنين الجايين بديلا عن الرئيس الموجود و مش فاهمين مدى قصور الطريقة دى حتى إدارة دول سبقانا كتير فى فهمهم و تطبيقهم الديمقراطية البرجوازية دى و ان ازاى الفكرة دى نفسها فاشلة و هما برة دلوقتى اكتشفوا مدى قصورها و بيراجعوا نفسهم ازاى يصلحوها .
المهم عشان ندخل فى الموضوع : بنقول كتير مبارك حكم البلد 30 سنة بانتخابات مزورة و دا مختلف عن مرسى اللى جى بالصندوق و بالتالى مينفعش نسقط مرسى لكن كان ينفع مبارك !! ..طيب تعالوا نشوف ..مبارك قعد 6 مدد رئاسية , فى خمس مدد منهم مكنش قدامه منافسين و كان بينجح بالتزكية !! ...يعنى طبقا لمعايركم الصندوقراطية البحتة اللى بتغفل كل الحاجات التانية دا مش تزوير ..التزوير يقتضى منافسين , هيزور ليه لو مفيش منافسين ..آخره يلعب فى نسبة الحضور , اقولكم بلاش 5 مدد , خليها أول مدتين لمبارك ، هل ممكن نستنتج بقى ان شاء الله انه مكنش ينفع نعارض مبارك و نسقطه و نثور ضده فى كل المدد دى !!
طبعا دا قمة الكلام الفاضى ..طول الوقت الشعب هو الأصل و الرئيس دا مجرد وكيل , و للشعب حق سحب الثقة من الوكيل دا فى اى وقت ...و حاجة زى الانتخابات الرئاسية المبكرة أداة مشروعة تماما و متعارف عليها فى النظام الديمقراطى البرجوازى و إن كان عليا انا شخصيا ...انا بقول الثورة دى لسة مستمرة و اللى ميعجبش المصريين نجيبه من جوة قصره و نعلقه فى الميادين .
