هو ربنا موجود ؟ طب ايه الدليل انه موجود ؟ طب الشيطان موجود ؟ طب هو الانسان اصلا ً اساسا ً خيّر و بيحب الحق و الخير و الجمال ؟ ولا الانسان بطبيعته انانى ؟ ممكن يعمل اي حاجة عشان يحقق سعادته ؟ طب ليه البشر بيحاربو بعض ما يعيشو مع بعض ف سلام ؟ ، هو مين اللى حط الحدود بين الدول ؟ يعنى ليه مش كلنا نعيش ع الكوكب كده ف دولة واحدة ؟
اكيد و انت صغير كنت بتسأل اسئلة زي دى ، الاجابة بقى مش هتلاقيها غير ف قسم فلسفة ، اوعى تفتكر ان ف قسم فلسفة هيدوك اجابات جاهزة عن اي حاجة ، هما هيعلموك بس ازاي تفكر و توصل لاجاباتك الخاصة و تقتنع بيها ، و ده اسمه المنطق ، و كمان هيقولولك البشر اللى فكروا فى الاسئلة دى وصلو لايه على مرّ التاريخ
اداب فلسفة ، احكيلكم عن ايه ولا ايه ، احكيلكم عن المنطق اللى هتتعلموه فعمركم ما هتقعو ف خطأ التفكير و بالتالى عمركم ما هتوصلو لنتايج غلط لو مشتو عليه ، و لا اكلمكم عن الفلسفة نفسها ، قد ايه من اللذيذ انك تفكر و تقرا عن ناس زمان فكرت فى نفس الاسئلة اللى شاغلة بالك و تعرف وصلو لايه .
غالبا ً التصور العام للفيلسوف انه راجل مجنون مربّى شعره و دقنه و منفصل عن العالم ، و بينتحر ف اخر الفيلم
لأ يا عم هتعرف ان الموضوع مختلف بقى ، بتدرس 7 حاجات اساسية ف الـ4 سنين ، فلسفة اسلامية ، فلسفة يونانية ، فلسفة حديثة و معاصرة ، منطق و تاريخ الفلسفة ، اخلاق و قيم ، فلسفة سياسية و ايدولوجيات ، مواد بينية ( علم نفس و اجتماع و انثر )
الدراسة جميلة و سهل جدا ً تتميز فيها لو بتفهم كويس ، و ممكن تتعين معيد بشوية تركيز بس
انا مش عارف اقولك ايه ، بس هقولك حاجة واحدة بس ، لو عايز تعرف الفلاسفة ممكن يبقو ايه ف اي مجتمع دوّر على جوجل عن حاجة اسمها " عصر التنوير " و اعرف الفلاسفة ازاي بكلامهم بس قدروا يغيروا اوروبا من مكان بتحارب الدول فيه بعضها على الثروة و السلطة ف حربين عالميتين لمكان بيحترم حقوق الانسان زي ما انتو شايفينها دلوقتى
الشغل بقى : بص يا سيدى اولا ً ممكن تشتغل باحث ، باحث دى ممكن تبقى باحث ف تاريخ الفلسفة ، او باحث فلسفى و خلاص او كده ، دول صفوة القسم و المهتمين و كده .
ممكن تطلع فيلسوف : دول صفوة الصفوة بقى سيادتك ، بس خلى عندك امل
هتقولى هو ف مصر فيه فلاسفة اصلا ً عايشين دلوقتى و كده ، هقولك اه دور على جوجل برضه عن أحمد العسيلى ، ولو عايز تشوف يوتيوب دوّر على برنامج اسمه الحلزونة - اه هو اسمه كده - و افهم فلسفة بجد بقى
ممكن بقى تطلع مدرس فلسفة و منطق : ده سعادتك السواد الاعظم من القسم و ده كويس على فكرة مش وحش
باحث سياسى او مفكر سياسى : لو تخصصت ف موضوع الفلسفة السياسية و الايدولوجيات و كده لو بتحب السياسة و كده هيساعدك ده كتير
ممكن تشتغل ف حاجات لها علاقة بالبرمجة و الحاسبات و النظم هتقولى ازاي اقولك البرمجة دى عبارة عن تسلسل منطقى + لغة ، انت هتبقى دارس تسلسل منطقى عبقرى جدا مش ناقصك غير اللغة ، بسيطة يعنى
ولو انتى بنت ممكن جدا ً تتجوزى و تقعدى ف البيت و لو ولد ممكن تشتغل فى حاجات مالهاش علاقة بقى بالموضوع و تحط الليسانس
ف برواز ع الحيطة فرد امن بقى و مندوب مبيعات ، و عيش حياتك
بقلم : مصطفى السيد
