اعرف عن كل اقسام آداب ~ قسم الاعلام واختباراته

قسم الإعلام من الأقسام الجديدة فى كلية الأداب علشان تدخل القسم دا لازم يكون مجموعك العام من افضل المجاميع المتقدمة علشان القسم بيقبل اعلى المجاميع المتقدمة اليه  ولازم يكون مجموع اللغات كبير "مش كبير اوى يعنى " بس المهم انك تعدى ال90% وفى امتحانين لازم الطالب ينجح فيهم علشان يقدر يدخل القسم الامتحان الاول بيكون امتحان تحريرى عبارة عن معلومات عامة فى كل حاجة 

(الرياضة_السياسة_معلومات تاريخية_ممكن معادلة حسابية_ وكام جملة كده بالانجلش تتررجم عربى والعكس ) يعنى هو بيكون ثقافه عامة وبيعتمد على المعلومات الى عندك بالنسبة لأسئلة السياسة مهم اوى تعرفى اسامى المحافظين والوزارات واعتقد ان اسئلة السياسة دى بتبقى سهلة اوى لان معلومتها متوفرة جدا وكمان ممكن يقولك عن برنامج معين ويسألك مين مذيع البرنامج وهكذا اما بالنسبة للأسئلة الرياضية مش شرط بتكون عن الكورة والأهلى والزمالك بتكون عن انواع تانية من الرياضات يعنى مثلا يسألك عن كرة السلة بتكون كام لاعب وكام فى الأحتياطى محدش يقلق من الموضوع دا بيكون سهل اوى بس على قد ماتقدر حاول تقرأ مش اكتر

الأمتحان التانى بقى بيكون امتحان شفوى غالبا الأسئلة الى بتكون فيه تعريف بنفسك وبتتسألى انتى ناوية على صحافة ولا اذاعه وتليفزيون ولا علاقات عامة والقسم الى هتختاريه هيتقلك ليه ؟؟ وبدعوا بقى بس خد بالك لو اخترت الصحافة هتتسأل عن رؤساء تحرير الجرايد ولو اخترت الاذاعه هتتسأل عن اسامى برامج ومذيعين اما بقى لو اختارت العلاقات العامة هتتسأل ليه ويعنى ايه العلاقات العامة دى ؟؟

اهم حاجة بقى انك تكون واثق فى نفسك جدا جدا جدا نبرة صوتك عالية ومش مهزوزة ووتبقى بتتكلم وانت واثق فى نفسك بلاش يحسوا انك خايف منهم اه دا مهم اوى اه واختيار الطلاب مش بيعتمد على شكله بقى والحاجات دى خليك بس واثق فى نفسك اه ولو تسألت فى حاجة ومش عارفها بلاش تفتى والنبى قول مش عارف وخلاص عادى يعنى مش عيب ولا غلط بالعكس المطلوب منك بقى مش انك تقفل ولا تجيب الدرجة النهائية الفكرة بس ان الأختبارين دول بيعلو من مجموعك مش اكتر (بس عن خبرة الى بيتحكم اكتر فى دخولك القسم هو مجموعك دا اهم حاجة )

يعنى بالنسبة للناس الى مجموعهم فوق ال 95% مثلا دول يدخلوا الامتحان وهما مش شايلين هم حاجة اصلا حتى لو مش جابو فى الأختبار مجموع كبير (ملحوظة :1-ان عدد الطلاب الى بيتم قبولهم فى القسم بيكون مابين " 50-55" مش اكتر من كده يعنى 2- القسم دا انتظاااااااام فقط وربنا يوفقكم

وده لينك على موقعنا فيه اهم كلام عن امتحان قسم الاعلام هيفيدكم جداً 

http://s-elmedan.blogspot.com/2012/09/blog-post_26.html


بالنسبة بقى للدراسة فى قسم الإعلام السنة الأولى بتكون الدراسة فيها عامة بمعنى ان المواد الى بيتم دراستها مواد عامة ومش مرتبطة اوى بالاعلام ماعدا مادتين بيكونوا ليهم علاقة بدراسة الاعلام وهما 1- الخبر فى وسائل العلام 2-والرأى العام ومجالاته
المادة الأولى متعلقة بكيفية كتابة الخبر الصحفى او الأذاعى او التليفزيونى

والمادة التانية بتتكلم عن ايه هو الرأى العام وايه هى مجالاته وامتى يكون الرأى رأى عام وامتى يكون رأى شخصى وهكذا

اما بقى باقى المواد بتكون مواد عامة من باقى الكليات زى مثلا بتدرس فى السنة الأولى
(عربى_ جغرافيا_ حقوق انسان_ علم اجتماع_ قانون_ سياحة_ تنمية ذاتية _ علم نفس_ تاريخ _ انجليزى_ اقتصاد _ ادارة )

وطبعا كل المواد دى عبارة عن مداخل يعنى الدراسة فيها بتكون بسيطة اوى ومش متعمقة يعنى .
اما فى بقى بالنسبة للدراسة فى تانية وتالته ورابعه بتكون اكثر تخصص شوية وبتدرس مواد متعلقة بالاعلام

وفى 3 شعب فى القسم الأولى شعبة الصحافة الثانية شعبة العلاقات العامة الثالثة شعبة الأذاعه والتليفزيون

وبيبدأ الطالب يختار الشعبة من سنة 3

تابعنا دايما على جروب دفعة المستجدين لطلاب صوت الميدان لاى استفسار 
ولمزيد من معرفة الاخبار وتفاصيل الاقسام  http://goo.gl/HbP1IC

بقلم هدى على