قسم الصوتيات من اكتر الاقسام الممتعه و دراستها شيقه فى كلية اداب هو صعب شوية و محتاج مذاكره و تعب بس مستقبله كويس جدااا وعشان القسم دا مميز فا ليه شروط عشان تعرف تدخله وشروط القبول بالقسم بياخد أعلى خمسين طالباً بعد أضافة مجموع اللغات الثلاث الى المجموع الكلى أن يجتاز الطلاب المتقدمين الاختبار الالكترونى فى اللغة الانجليزية أن يكون الطالب خالياً من عيوب النطق والكلام (مقابلة شخصية) لا يقبل القسم طلاب الانتساب العادى والمحولين .
بعد كده لو قبلت فى القسم بتيجى مرحلة الامتحان الالكترونى . مبدايا كده كل الامتحانات فى القسم بتبقى بالطريق دى يعنى امتحانك كله بيبقى اختيارت MSQ اسئلة الاختيارات المتعددة و بعد ما تخلص الامتحان بتدوس end exam وتعرف انتا جبت كام
الموضوع سهل و بسيط جداا . نرجع للامتحان بتاع القبول بقا . دا بيبقى هدفه انه يقيس مستواك فى الانجليزى عشان الدراسة فى القسم كلها باللغة الانجليزية فا امتحانك بيتقسم لجزء اختيارات و جزء listening يعنى بتسمع حوار و بتحل الاسئلة اللى عليه و الجزء الاخير بيبقى written بتكتب paragraph عن حاجه معينة و بعد ما تخلص الامتحان بيتعملك
interview بتقعد مع احد دكاترة القسم يتكلم معاك بالانجليزى طبعااا عشان يعرف انتا تعرف ايه عن القسم و عاوز تدخله ليه و كده و من الكلام معاك بيركز عندك عيوب فى النطق ولا نطقك سليم بعد كل ده بقا القسم بيحدد ال 50 طالب اللى هيقبلهم .
نتككلم عن الدراسة بقا
الدراسه فى القسم بتبقى منقسمه لاكتر من حاجه يعنى مثلا. بندرس فيزياء الصوت ويعنى إيه موجات صوتيه وسرعتها وتكوينها وكده وكمان بندرس جزء فسيولوجى بناخذ فيه تشريح كل الاجزاء اللى بتشترك فى عمليه الكلام و السمع وتشريح المخ وإزاى بيترجم الصوت لأشارات أحنا نفهمها وكده وغير دا بندرس االلغة وإزاى الأطفال بيكتسبوها وإزاى تعالج الأطفال ألى عندهم عيوب فى النطق والأطفال ألى عندهم توحد أو تأخر و آهم حاجه فى كل ده انك بتدرس النطق الصح للحروف ومخارج آلالفاظ ودا بيساعد فى تدريس اللغات وكده بالنسبة للكتب بقا فا تقريبا اغلب المواد الكتب بتاعتها بتبقى عباره عن مراجع اجنبيه بتصور منها الجزء اللى الدكتور يحدده يعنى ملناش كتب جامعية دكتور هو اللى زى بقيه لاااقسام الا فى مواد محدده اللى بيبقى الدكاترة بتاعتها من اقسام تانية زى اللغة العربية مثلا
خلصنا دراسة و اتخرجنا الحمد لله نشتغل ايه بقا ؟؟ انا اقولك انتا ادامك مجالات كتيرة اوى تشتغل فيها زى مثلا التخاطب دا اللى هو انك تعالج الالطفال اللى عندهم عيوب فى النطق و اللى عندهم تأخر او توحد او ممكن تشتغل فى تعليم اللغة العربيه للاجانب او ممككن تشتغل فى هندسة الصوت او ممكن فى البرمجة اللغويه وكل المجالات دى مطلوبه جداااا وخصوصا التخاطب مطلوب فى مصر جدااا و فى الدول العربيه كمان اكتر
تابعنا دايما على جروب دفعة المستجدين لطلاب صوت الميدان لاى استفسار
ولمزيد من معرفة الاخبار وتفاصيل الاقسام اضغط هنا
بقلم : نور نصر
