بص يا سيدى ببساطة كدة قسم اللغات الشرقية و ادابها .. من الاقسام الجديدة فى كلية اداب .. ليه مميزات كتير .. اولا العدد فيه اقل كتير من باقى الاقسام .. حاجة كدة رايقة .. دة غير انه و بلا فخر قاعاته لسة مفتوحة السنة اللى فاتت .. حاجة تفرح القلب و تخليك متفوتش محاضرة .. نيجى بقى للدكاترة .. الدكاترة فى القسم فى منهم اجانب .. اهل اللغة يعنى .. يعنى تطلع من القسم و انت متظبط فى اللغة ..
القسم السنة دى هيبقى من غير شروط هيبقل اعلى 200 طالب متقدم
القسم فى تلات لغات اساسين .. التركى و العبرى و الفارسى ..
فى اول سنة بتدرس كل اللغات دى متشكلة بداية من ال a b c .. و بتاخد تاريخ عام لبلاد اللغة دى .. و ادب اللغات دى بشكل عام .. غير انك بتدرس تاريخ و لغه عربيه و لغه اوروبيه (انجليزي / فرنساوى) و مواد نظرى تانية بتختلف كل سنة .
من تانى سنة بقى يبدا التخصص .. و دة بيبقى على حسب حاجتين .. اللغة اللى انت حاببها. و التقدير بتاعك فيها ان وفقك الحظ و التقدير طلع حلو يبقى انت فى الشعبة ..
فى الاغلب بيدققوا على تقدير التركى .. انما بالنسبة للعبرى و الفارسى فالموضوع مش صعب ..
نيجى بقى لكل تخصص .. بالنسبة للتركى لما بتتخصص فيه بتدرس لغة تانية معاه بشكل مبسط .. اللى هى الفارسى ..
بالنسبة لشعبة العبرى .. فبتدرس لغة تانية بردو معاه .. و هو فى لغتين بتختار منهم .. يأما سريانى .. يأما حبشى .. و الاتنين بيفيدوا فى التخصص عموما ..
اما بالنسبة لشعبة الفارسى .. فاللغة التانية بتبقى اوردو ..
و بعد ما تتخرج ان شاء الله بيبقى معاك لغة و خلفية كبيرة عن بلد اللغة دى و تاريخها و اهلها و نظام حياتهم و ادبهم و ثقافتهم ..
بالنسبة لمجالات العمل .. فبيقى مترجمين فى السفارات و وزرات الخارجية .. و السياحة .. و دى غالبا بتحتاج دبلومة سياحة .. مع اللغة اللى انت متعلمها ..
و يا سلام بقى لو الانجليزى معاك حلو .. مترجمين .. مترجمين فى جرايد و مجلات .. و بالنسبة للتركى .. ففى هنا مصانع اتراك فى برج العرب بيحتاجوا مترجمين تركى .. و فى مدارس لغات فى اسكندرية بيبقى نسبة الاتراك فيها كتير .. وبيحتاجوا مدرسين معاهم تركى ..
بالنسبة للولاد فساعات بيحتاجوهم فى الجيش و خصوصا بتوع عبرى
تابعنا دايما على جروب دفعة المستجدين لطلاب صوت الميدان لاى استفسار
ولمزيد من معرفة الاخبار وتفاصيل الاقسام اضغط هنا
بقلم : اية طارق ، انجى يونس
