-علم النفس من اكتر الدراسات الممتعه اللي ممكن تدرسها في كلية الاداب .
هتدرس فيه ايه؟ هتدرس حاجات كتير اوي , هتعرف ان علم النفس يعني علم سلوك الكائن الحي , وهتعرف ان علم النفس ليه فروع كتير اوي , زي علم النفس الاجتماعي , وعلم النفس الاسري , وعلم النفس الطفل , وعلم النفس البيئي , وعلم النفس المهني , وعلم نفس الادمان , وغيرهم.
-مش بس كده ده انت كمان في اول سنه هتدرس فلسفه , وانثربولوجي"علم الانسان" , واجتماع , ليه؟ عشان علم النفس والاجتماع والانثربولجي والفلسفه لحد وقت قريب اوي كانوا حاجه واحده وكان اسمهم مجموعة العلوم الاجتماعية , وبعدين انفصلوا وكل علم بقى له دراسة لوحده.
-انت كمان هتدرس بيولوجي , هتقولي بيولوجي ازاي طب احنا اكترنا كنا ادبي في ثانوية عامه؟ هقولك ماتقلقش دي مادة كده خفيفة هتحبها اكتر من المواد النظري.
-هتدرس كمان مادة اسمها معمل علم النفس ودي معاك كل سنة هي ومادة الاحصاء .
-عندك كمان مادة اسمها مادة التدريب العملي ودي في سنه تالته ورابعه , في سنه تالته هتنزل تدريب في مصانع وشركات , في سنه رابعه هتتدرب في مستشفيات ومصحات نفسيه .
-نيجي لشروط القسم , اولاً القسم مالهوش امتحان قبول , ثانياً متحددش ليه شروط وهقبل حسب الطاقه الاستيعابية للقسم .
-خلصت دراسة وعايز تشتغل هتشتغل ايه؟
اولاً لازم تنسى حوار الطبيب النفساني ده خالص , معظم الناس تقول انا هدخل اداب قسم علم نفس عشان اما اتخرج ابقى طبيب نفساني بقى وافتح عيادة , طب قولي انت كده طبيب من كلية اداب ازاي؟ مش منطقية صح؟, هيبقى اسمك اخصائي نفساني يعني ممكن تشتغل في مستشفى , او مدرسة , او في الشركات , او في الجيش , او في السجون , او في مراكز تأهيل المعاقيين .
-كمان انت ممكن تجتهد في دراستك وتجيب تقديرات عالية وتتعين معيد في القسم.
-طب مش عايز تشتغل اي حاجه من دول وعايز تبقى مدرس علم نفس هقولك تعمل ايه , بعد ماتخلص دراستك ف حاجه اسمها دبلومة تربوي دي بتاخدها في كلية تربية لمدة سنتين وكده تبقى مدرس زيك زي اللي اتخرج من تربية .
-لو عايز تنمي دراستك اكتر في علم النفس وتبقى اخصائي نفساني متميز في دبلومة اسمها علم النفس الاكلينيكي دي بردو لمدة سنتين بعد الدراسة و الاخصائيين اللي بيعملوا الدبلومة دي الدكاتره النفسيين بتطلبهم عشان يبقوا مساعدين ليهم.
بس خلي بالك عشان تعمل دبلومة او دراسات عليا وماجستير بعد الدراسة لازم يكون تقديرك العام طول الاربع سنين ع الاقل جيد .
تابعنا دايما على جروب دفعة المستجدين لطلاب صوت الميدان لاى استفسار
ولمزيد من معرفة الاخبار وتفاصيل الاقسام اضغط هنا
بقلم : هبة الله ناصر
